TULADHA PASRAH PENINGSET
Assalamu' Alaikum Wr.Wb.
Kula nuwun,...minangka purwakaning atur, hanyenyadhong berkahipun Gusti ingkang Maha Agung, mugi hamemayungana wonten hing madyaning pepanggihan ing wanci dalu menika. 5 sifat 1443 H kaleres 7 September 2021
Bapa Muhammad Marzuki ingkang winantu ing pakurmatan.
Bilih sowan kula ing wanci dalu menika, kula rinesaya dening panjenenganipun Bapa Agus Dwi Laksana sekaliyan, ingkang sakperlu kula kedhawuhan matur ing ngarsanipun Bapa Dullah Mukti sekaliyan, ing ri kalenggahan menika, panjenengan ingkang kasuwun hanyalirani.
Atur kula ingkang kapisan, kula kadhawuhan ngaturaken salam wilujengipun Bapa Sudarmaji sekaliyan, ingkang linambaran donga pamuji, mugi kahaturna dumateng Bapa Dullah Mukti sekaliyan, minggahipun dumateng para keluarganipun.
Wondene jangkeping atur ingkang kaping kalih, kula kedhawuhan hamasrahaken, paningset, abon-abon sarta pangiring, hanggenipun haningseti rembag badhe hanjodokaken putra turunipun, ingkang hanama pun Nak Bagus Cholid Al Fatih .kaliyan putra ingkang mijil putri saking Bapa Dullah Mukti sekaliyan, ingkang hasesilih pun Rr Triyan Juli Wardani
Sanadyanta paningset, abon-abon sarta pangiring, menika hanamung sapala mugi wontena keparengipun, suka hanampi kanthi renaning penggalih.
Ugi kula kedhawuhan ngaturaken redana, ingkang arupi arta, minangka syarat sarana hanggenipun mahargya putra.
Mekaten Bapa Dullah Mukti hanggen kula matur wonten hing ngarsa panjenengan, bilih atur kula menika kathah sanget ingkang dawah lepat, kula nyuwun hagunging samodra pangaksama.
Kanthi pada pepet pepuntaning atur. Wassalamu' Alaikum Wr.Wb.
TULADHA HANAMPI PASRAH PENINGSET
Ass. Wr.Wb.
Kula nuwun,..nugraha hawit saking sih ipun Pangeran, mugi tansah hangliputana, wonten hing madyaning pepanggihan hing wanci dalu punika.
Bapa Agus Dwi Laksana .ingkang winengku hing karahayon.
Hamurwakani atur kula ingkang kapisan, kula ngaturaken pambagya wilujeng, rawuh panjenengan sa pangombyong.
Wondene ingkang kaping kalih, hanggen panjenengan ngaturaken salam kawilujengipun Bapa Muhammad Marzuki sekaliyan, sampun kula tampi kanthi bingahing manah, hing mangke badhe kula haturaken ingkang hambawani damel.
Ugi mboten katalumpen, salam taklimipun Bapa...sekaliyan, mugi kahaturna dumatheng Bapa...sekaliyan, minggahing para kulawangsanipun.
Dene hanggen panjenengan hamasrahaken, paningset, abon-abon sarta pangiring, sampun kula tampi kanthi tangan kekalih, tumuli badhe penganten sekaliyan, badhe hanindakaken lampahing tata cara liru kalpika.
Hawit sru panyuwunipun Bapa...sekaliyan, panjenengan sa pangombyong, dipun suwun hanjenengi ngantos purnaning pepanggihan hing wanci siang/dalu menika, saperlu paring donga pamuji, mugi lampahing tata cara kalis hing rubeda sambikala.
Mekaten Bapa...hanggen kula hananggapi pasrah panjenengan, bilih atur kula menika namung witing klapa salugunipun, kari kutha janur rineka gentha, apuranta lepat nyuwun pangaksama.
Kula kanteni hasesanthi, rahayu, rahayu ingkang sami pinanggih lan sukarena.
Wassalam, Wr.Wb.
#TULADHA #HATUR #PAMBAGYA #PANINGSET
Ass.Wr.Wb.
Kula nuwun...Para pinisepuh, sesepuh ingkang sanget kula bekteni. Para tamu kakung saha putri, ingkang kahaturan rawuh, sedaya winantu hing pakurmatan.
Hawit saking keparengipun Bp....sekaliyan, bilih hing ri kalenggahan punika, kula ingkang rinesaya matur wonten hing ngarsa penjenengan sedaya.
Minangka purwakaning atur, langkung rumiyin sumangga panjenengan sedaya kula dherekaken ngaturaken panuwun syukur wonten ngarsanipun Gusti ingkang murbeng dumadi, bilih ing wanci siang punika, kula saha panjenengan sedaya saget manunggil wonten hing wisma pepanggihan menika kanthi wilujeng nir sambikala.
Para tamu kakung saha putri ingkang winantu hing pakurmatan.
Haturipun Bapa...sekaliyan lumantar kula, ingkang kapisan ngaturaken pambagya wilujeng rawuh panjenengan sedaya, selajengipun kula derekaken lelenggahan kanthi merdika merdikaning penggalih.
Dene ing wanci siang punika panjenengan dipun suwun rawuh, wigatos dipun suwuni jurung pandonga pamuji, hanghenipun Bapa...sekaliyan hanampi paningset, hanggenipun badhe jejodhohanipun putra pawestrinipun ingkang hasesilih, Rr....ingkang katemben pepacangan kaliyan pun Bgs....admaja kakungipun Bapa...sekaliyan ingkang pidhalem ing.... .
Mugi putra ingkang katemben pepacangan punika tinebihna saking panggodha satemah enggal tinangsulan reh satataning agami saha nagari, mugi hing benjingipun sageda handamel kuncaraning asma para keluarga.
Para tamu kakung saha putri ingkang sampun kahaturan rawuh.
Bapa...sekaliyan, ugi ngaturaken panuwun dumatheng kadang kadeyan, tangga tepalih, ingkang sampun cancut bikut, paring sabiyantu murih rancaking pepanggihan hing wanci siang punika, Bapa... Sekaliyan namung saget ngaturaken gung panuwun ingkang tanpa upami.
Mekaten para tamu kakung saha putri, haturipun Bapa...sekaliyan, lumantar kula, dene kula nglenggana kathah sanget atur kula ingkang mboten handamel renaning penggalih, kula nyuwun hagunging samodra pangaksama.
Kula kantheni hapepuji yana yuwana sagung dumadi nugraha niskala.
Wassalam Wr.Wb
Nuwun.
#TULADHA #HATUR #PAMITAN #TATACARA #PANINGSET*
Ass. Wr.Wb.
Kula nuwun...para pinisepuh, sesepuh saha para tamu kakung saha putri, ingkang winantu hing pakurmatan, langkung-langkung dumatheng Bapa...sekaliyan ingkang kula bekteni.
Gegandengan, hanggen kula sowan saha marak, wonten hing madyaning pepanggihan hing wanci siang menika sampun sawetawis wekdal, keparenga kula sa pangombyong badhe nyuwun pamit.
Namung sakderengipun kula hamengkeraken saking wisma pepanggihan menika, keparenga kula badhe nyuwun keterangan, benjing menapa ingkang katemben pepacangan menika, enggal tinangsulan reh satataning agami saha negari, minangka kagem pelaporan, hanggen kula rinesaya hing wanci menika
Ugi kula nyuwun pangapunten ingkang agung,saklebetipun kula sowan saha marak,ingkang sakintenipun mboten handamel suka renaning penggalih, kula ingkang nyuwunaken hagunging samodra pangaksama.
Mugi-mugi sapengker kula saking wisma pepanggihan menika, kulawarga saking Bapa...sekaliyan, tansah ginanjar wilujeng hing sadayanipun.
Dene wangsul kula sa pangombyong, tansah kinanthi dening Gusti, saget pinanggih kaliyan keluarga kanthi suka rena.
Mekaten Bapa...sekaliyan hanggen kula matur wonten ngarsa penjenengan, kathah sanget kekiranganipun, kula nyuwun pangapunten.
Wassalam" Alaikum Wr.Wb.
Nuwun.
