SADA LANANG

SADA LANANG 

Manthera cahyamu,

Sak sada lanang, 

Dimen bisa gawe pepedhang jagad

Manthera sunarmu, 

Sak sada lanang, 

Dimen, ombyake kawula ora kelangan lacak, 

Saben tumandang gawe tansah kepenak

Manthera sadaku, 

Sak sada lanang, 

Kareben kuthaku rame gumyah, 

Kaya wingi kepungkur

Gawenen manther, 

Sadaku, sak sada lanang, 

Dimen ukara-ukara lan tembung, 

Bisa kasuntek ambyar, 

Mblabar ngebeki saben latar

Gawenen manther sunare, 

Sak sada lanang, 

Dimen ora wegah..... nggugah...... lan obah, 

Dimen pojokan, prapatan, protelon, lan gang-gang, 

Kebak ukara kang endah

Sak Sada lanang, anthera sunarmu, cahyamu

Aku tansah ngimpi, 

Ana sunar, ora ketang sak sada lanang, 

Nanging tansah mrebawani

Sada lanang, tansah tak buru, 

Ngendi panggonane, 

Sing bisa ngadhemke ati tentrem

Sada lanang, 

Aku lumaku nuju sunarmu

Sada lanang

Esuk iki, 240424

Hudabrah Cakebasen 

PINESTHEN

 PINESTHIEN

Rebo Pon,  10 April 2024

1 Syawal 1445 H tabuh 24.00

Ing salebeting tengahing dalu 

Kang keprungu amung swaramu

Kepara njalari krenteng ing kalbu

Lirih lon~alon saya banter lan tumurun

Angin kang kaiket tumetesing embun 

Cetha bilih katresnanmu lun kumelun

Isening alam  ing wengi iki

Kadya mipil jagad milangkori

Satemah sareh ning turu ora lali

Ati kang sumisih saka asmane GUSTI

Adoh tinimbalan sepining jalma pinezthi

Kudu tinelatih wirid tawajuh tentreme ati

TEK LILAKNA

 TEK LILAKNA

Hudabrah Cakebasen 

Taklakoni tak ayahi amecaki marga

Lelakon bale wisma suci

Urip bebrayan linambaran Tresna asih

Susah begja mulya bebarengan sliramu

Pak Dhe Jazuli pepujaning ati

Bapak kanggo putra putrine

Ananging titi wanci Iki

Den bisa kokselaki

Sliramu tinimbalan Gusti

Mara sowan ngugemi pinesthi

Kabeh wis tinakdir 

Takdire Gusti Kang Murbeng Dumadi

Karasa jroning nala

Pindha thathit ing wayah Rina

Dhuh Gusti

Kudu taklilakna 

Kerana wis ginars pepesthene sliramu

Tumetesing waspa Iki 

Datan bisa gawa bali tresnamu kanggo aku

Amung pathok bisu dadi seksi 

Donga panyuwunku 

Mugya ora dadi rendheting pisowanmu

Swarga  langgeng

Inggih pungkasaning laku

Banyumas, Romadhon ke 10

LAKSANA

 "PAMER ILANG PAMOR"

***

Ojo Seneng Pamer, mundak ilang Pamormu.

(Jangan suka pamer nanti malah hilang pamormu)

NYADRAN BARENG

 SYA'BAN SASINE PARA ARWAH

Tiyang  jawa mastani wulan Sya'ban minangka sasi Ruwah.

Istilah Ruwah dipun pundut saking  bahasa arab yakni Arwah. Kahingga mboten lepat nalika  wulan Sya'ban katah  masyarakat jawa ingkang ngleksanani  tradisi kangge sedekah ruwahan lan nindakaken inten pinten lelampahan kadosdene  ziarah religi, kangge ndugeni  makam para leluhur, utawinipun tiyang-tiyang sholeh kang sampun kasedan jati  utawi tilar ndunya minangka bukti bilih  masyarakat jawa mboten ngantos Ical  jawanipun lan minangka bukti bilih masyarakat jawa tasih njagi tradisi kearifan lokal kasebut.

Lan kanyata tradisi menika  sanes Mligi  sekedar tradisi, lan ruh tiyang kang sampun tilar ndunya saged wangsul Dateng griiya  sanak kerabat kang tasih gesang nalikane malam jum'at niku nggih  kanyata sanes mitos blaka, namung nggih kepara wonten  dalile kang nuduhaken perkawis kasebut. Bilih  dipun aturaken ing  ndalem kitab Daqoiqul Akhbar nalikane  ruh tiyang kang sampun tilar ndunya wangsul teng griya  saperlu ningali  sanak kerabat mboten namung  malem  malem jum'at blaka, tapi ing saben  malem kang keramat ugi tansah hamirsani ing antawisipun:

1. Malem Riyadi Qurban lan romadhon

2. Malem 10 Muharron

3. Malem 1 Rojab

4. Malem Nisfu Sya'ban

5. Malem Lailatul Qodar

Mugiya Kula dalasan sampeyane  sedaya mboten kalebet  tiyang kang kesupen  lan nglali dateng  keluarginipun kang  samya wonten ngalam kelanggengan tihu Kula  ngleksanani ziyaroh menika. Amin Ya Mujibassa'ilin.....

ANG KANTHIL

KEMBANGE KANTHIL

                 Dening Hudabrah Cakebasen

Kembang kanthil kang kumanthil

Nyipet   rasa pangrasa

Kepang buntele kangen

Maring Kanthil sing wis tinandur

Ing taman plataran sisih kidul 

Kanthil....

Ora lila lamun luh temetes

Kembeng nang sotyanira

Ndamar kanginan

Tak usap dimen ginanti esem pahit madu

Ora tega riwe nelesi pasuryanmu

Dak Lap kanthi tangan lamba

Ben pasuryan sumringah

Tanpa sayah sinawang

Kanthil...

Tak gegem astamu

Kayadene gula kepyur pulut

Datan genggang sarema bebasane

Kanthil...

Nadyan adoh rasane caket

Pangusaping luh

Pangelaping riwe

Uga pangregeming asta

Tansah kacithak ing pangangen 

Bareng sumilire angin

Utawa..

Nyartani tumruning udan

Nadyan mokal pinethik raga

Teleng brangta 

Ngrenggani ngaurip

Tumekeng kukuting jagad

WULAN SING DADI KANGENKU

 WULAN SING DADI KANGÊNKU

Ing madyaning ratri kang wengi kiye

Tak goleti sunaring rêmbulan ing wiyati

Satlérapan ana manisé èsèmmu

Angimbuhi gêdhéné rasa kangênku

Mring arumé jiwanggamu

Uga rapêt lan angêté rangkulanmu

Nalika nyuntek rasa sih trêsna maring aku

Lir siniram banyu sêwindu

Méga klawu kagandhèng déning samirana

Angalingi sasi kirana

Manisé èsêmmu wis lunga

Rasaku dadi gêla

Kapangku ning ora entuk tamba

Maring méga kaé aku kulak pawarta

Kapan sêsandhingan klawan pêpujaning nala

Anglaras gêndhing trêsna salaminya

Kebasen, 5 Maret 2024