Pranata adicara lamaran adat mbanyumas

 Assalamu`alikum Wr. Wb.

Para aji sepuh, kasepuhan, miwah pinisepuh  ingkang satuhu minulyeng budi, para tamu ingkang satuhu kinurmatan. Sumangga kula dherekaken ngaturaken puji pangalembana miwah syukur dhumateng Gusti ingkang akarya jagad, nenggih Pangeran ingkang Mahawelas lan asih, awit saking kanugrahanipun kula miwah panjenengan saged makempal ing dalemipun Bapak-Ibu KYAI HAJI AHMAD CHAMDANI  Saperlu paring pangestu tumindakipun adicara lamaran ing wanci menika.

Keparenga kula ingkang kapatah pamengku gati kinen nderekaken gatining laksana ing wanci menika. Menggah tata rakiting titi laksana rinacik mekaten:

1.      Kapurwakan kanthi pambukaning  pahargyan lumampahaken kanthi  waosan Ayat SuciAl Qur'an,

2.      Saparipurnaning pambuka, ngancik adicara kaping kalih nun inggih atur pambagyaharja Basuki saking pamengku gati,

3.      Titi laksana ingkang kaping tiga, nun inggih atur panglamar saking  bapak KYAI KHUSONI,

4.    Salajengipun, adicara ingkang kaping sekawan, nun inggih atur panampi panglamaripun 

5.   Adicara ingkang pungkasan inggih menika waosan Dunga panutup.

Mekaten kalawau menggah tata rakiting adicara ing wanci menika. Sumangga tumapak adicara purwaka, adicara binuka kanthi pandonga dhumateng Pangeran mrih rahayu karsa. Ndedonga kula dherekaken. Sumangga Alfatihah ...!

Matur nuwun, mugi Gusti kang Mahakawasa kersa paring sih nugraha satemah tumapaking karya saged kalis sambekala. Para tamu ingkang kinurmatan, sawetawis panjenengan lenggah, pramila kepareng ingkang hamengku gati, nun inggih Bapak-Ibu KYAI HAJI AHMAD CHAMDANI  badhe ngaturaken pambagyaharja. Ingkang minangka Sesulihipun nun inggih Bapak SUSWANDI. Dhumateng Panjenenganioun kasumanggaaken! Dene Bapak-Ibu KYAI AHMAD CHAMDANI  kepareng jumeneng ngampingi Bapak SUSWANDI.

Matur nuwun wonten ngarsaning Bapak Sutrisna, tumuli ngancik adicara ingkang angka tiga inggih menika atur panglamar. Pramila dhumateng Bapak HAJI KHUSONI minagka tetungguling lampah kepareng jengkar saking palenggahan, tumuju papan sasana pandayawara. Dene Bapak-Ibu SUBANDI, nun inggih calon besan kepareng ngamping Bapak HAJI KHUSONI. Sumangga!

Matur nuwun dhumateng Bapak HAJI KHUSONI ingkang sampun paring atur lamaran. Tumuli Bapak-Ibu KYAI HAJI ACHMAD CHAMDANI badhe ngaturaken atur panampi lamaran, ingkang minagka badaling wacana sinambeting raga inggih menika Bapak KYAI JAMALUDIN. Dhumateng Bapak JAMALUDIN, sumangga!

Sampun paripurna anggenipun Bapak KYAI JAMALYDIN ngaturaken atur panampi lamaran. Dene adicara ingkang pungkasan nun inggih panutup. Sumangga adicara menika katutup kanthi waosan Dunga  sesarengan. Sumangga Al Fatihah !

 Kula pribadi minagka pranatacara, kalamun wonten kithaling basa, ceweting ukara, mugi para paduka para tamu kersa paring pangaksama. Nuwun.