Mematri Diri

 MEMATRI DIRI

Bakal Ndak ugemi

Apa kang metu

Mogel obahing lathi

Kanti gawa janji-janji

Prasetya ing diri pribadi

Bakal Ndak reksa

Apa kang wus kawedar

Saka pangucape jiwa ing rasa

Snajan bakal akeh rubedha

Kang bakal nuwuhke kuciwa

Aku mono sadrema nyekeli

Tutur atur pepundhen kang ninggali

Isen-isening bumi Pertiwi

Kanggo jejeg, madege nagari

Bakal Ndak dudah

carita-caritane Simbah

Ing kala atiku krasa sebah

Mecaki kahanan kang saya bubrah

Bakal ndak waca

Jeroning driya aksara-aksara kuna

supaya atiku tansah pracaya

Marang lelakon semana

Gatra-gatra isih tak gawa

Sajeroning dhadha sing karantha-rantha

Nyawa Solah bawane para punggawa

Kang lagi kembul bujana

Ngangkangi bangsa

Wanda-wanda Iki isih ndak patri

Ing tengah-tengah diri pribadi

Kanggo nyritani putra-putri

Dimen padha mangerteni

Aksara-aksara isih coba ndak tata

Kang paring sugatha

Ing wayah rina

Supaya para manungsa

Pracaya marang sujarah kang ana

Lan sing uwis tinata

Hurup-hurupku wus kasusun

Ing tengah wengi kang suwung

Kalane pikiran lagi buntung

Kebak panglamun

Supaya atiku ora suwung